Pyetjet më të shpeshta mbi fiskalizimin
Në këtë rubrikë do të gjeni Pyetje-Përgjigjet më të shpeshta dhe sipas specifikave të natyrës teknike, ligjore, grupeve të interesit, etj, të cilat do të përditësohen, në faza të ndryshme të zbatimit të projektit të Fiskalizimit.
Çfarë është fiskalizimi?
Fiskalizimi është një tërësi masash që përdoren për të zvogëluar evazionin fiskal në transaksionet me dhe pa para në dorë. Në procesin e fiskalizimit, të gjitha transaksionet (faturat) raportohen në kohë reale në Administratën Tatimore. Për efekt të identifikimit dhe gjurmimit të çdo transaksioni, çdo fature i jepet numri identifikues i veçantë i faturës (NIVF).
Kush do të jetë subjekt i fiskalizimit?
Në zbatim të Ligjit Nr. 87/2019, datë 18.12.2019 "Për faturën dhe sistemin e monitorimit të qarkullimit", subjekt i fiskalizimit të faturës do të jenë:
- Të gjithë tatimpaguesit që lëshojnë faturë, sipas këtij Ligji dhe legjislacionit në fuqi për tatimin mbi vlerën e shtuar;
- Organet publike;
- Bankat, institucionet financiare jobankare dhe subjekte të tjera, që ofrojnë shërbime pagesash të faturave elektronike.
A kanë entet publike detyrim ligjor që të lëshojnë fatura të fiskalizuara apo janë të përjashtuara?
Referuar Ligjit nr. 87/2019 "Për faturën dhe sistemin e monitorimit të qarkullimit", i ndryshuar, entet publike qendrore/vendore kanë detyrimin ligjor për të lëshuar fatura të fiskalizuara vetëm për rastet kur aktiviteti që ata kryejnë veprimtari me karakter përfitimi ekonomik.
A janë të detyruar organizatat jofitimprurëse të lëshojnë fatura të fiskalizuara?
Për tarifat e anëtarësimit dhe dhurimet, një organizatë jofitimprurëse nuk është e detyruar të lëshojë fatura dhe të kryejë procedurën e fiskalizimit, sepse organizat jofitimprurëse nuk vlerësohen si persona të tatueshëm për këto pagesa.
Për pagesa nga biletat e shitura, organizata jofitimprurëse është e detyruar të lëshojë fatura dhe të kryejë procedurat e fiskalizimit.
Çfarë ndodh nëse komunikimi/lidhja me Administratën Tatimore ndërpritet?
Në rast të ndërprerjes së lidhjes së internetit, tatimpaguesi lëshon faturë si në një transaksion normal, me ndryshimin e vetëm që fatura nuk do të ketë kodin NIVF.
Tatimpaguesi duhet që brenda 48 orëve pas momentit kur ndërpritet lidhja e internetit, të mundësojë lidhjen dhe të dërgojë të gjitha faturat e lëshuara gjatë transaksioneve offline. Nëse është e pamundur që lidhja të bëhet brenda 48 orëve, tatimpaguesi duhet të informojë Administratën Tatimore dhe të sigurojë dokumente ose prova të tjera që demonstrojnë pamundësinë për të krijuar një lidhje interneti.
Cfarë duhet bërë në rastin e një keqfunksionimi të pajisjes fiskale?
Nëse pajisja fiskale pëson një mosfunksionim të plotë, tatimpaguesi lëshon fatura nga blloku i veçantë i faturave. Tatimpaguesi është i detyruar të mundësojë funksionimin e pajisjes fiskale brenda pesë ditëve nga dita kur pajisja fiskale ka pësuar një mosfunksionim të plotë, ose të sigurojë një pajisje të re.
Të gjitha faturat e lëshuara nga blloku i veçantë i faturave, duhet të fiskalizohen brenda 5 ditëve.
Si mund të verifikohen nëse janë të fiskalizuara faturat fiskale?
Të gjithë blerësit ose marrësit e faturave mund të verifikojnë nëse fatura e tyre është fiskalizuar dhe dërguar në Administratën Tatimore, brenda 60 ditëve nga data e faturës. Verifikimi kryhet përmes:
- Platformës qendrore të faturës
- Aplikacionit të veçantë duke skanuar kodin QR në faturë
- Zyrës së Administratës Tatimore
A mundem të përdor të njëjtën certifikatë për të gjitha pajisjet fiskale të biznesit?
Certifikata dighitale është e lidhur në mënyrë unike me biznesin si entitet. Pra, e njëjta certifikatë dighitale mund të përdoret për të gjitha pajisjset fiskale të biznesit.
A nevojitet një printer specifik?
Jo, nuk kërkohet një lloj specifik harduerësh. Çdo printer që mund të printojë përmbajtjen e detyrueshme të faturës (siç përcaktohet me ligj) është i mjaftueshëm. Është e rëndësishme që printeri të mund të printojë kodin QR në faturë.
A mund të ndryshohet fatura pasi është printuar?
Fatura nuk mund të ndryshohet pas printimit, sipas legjislacionit në fuqi për tatimin mbi vlerën e shtuar dhe ligjit të fiskalizimit. Për qëllim të saktësimeve të faturës pas lëshimit të saj, duhet të lëshohet fatura korrigjuese.
A është i detyrueshëm printimi i faturës?
Për të gjitha transaksionet me para në dorë, printimi i një fature është i detyrueshëm, përveç shërbimeve elektronike, ose kur furnizimi i mallrave apo shërbimeve është kontraktuar dhe ngarkuar përmes një aplikacioni celular, dyqan në internet, ose të ngjashme. Në këto raste fatura mund t'i dërgohet blerësit me postë elektronike ose si faturë elektronike.
Si kryhet procedura e anulimit të një fature?
Teorikisht nuk ekziston "anulimi i një fature", por duhet të lëshohet një faturë korrigjuese (ose faturë e kthimit). Fatura korrigjuese përmban numër reference të faturës origjinale që korrigjohet, për të cilën sistemi gjeneron një mesazh të veçantë dhe i dërgohet Administratës Tatimore për fiskalizim.
Me përfundimin e afatit një vjeçar të përdorimit të certifikatës elektronike duhet të bëhet rinovimi i saj?
Po, me përfundimin e afatit të vlefshmërisë së certifikatës elektronike, të paktën 30 ditë përpara tatimpaguesi duhet të nisë aplikimet për të kryer rinovimin certifikatës elektronike. Aplikimi për rinovimin e saj është i njëjtë me aplikimin për herë të parë, nëpërmjet portalit e-Albania.
Ku mund të drejtohem për pyetje dhe sqarime rreth fiskalizimit?
Për pyetje dhe paqartësi në lidhje me procesin e fiskalizimit, mund të shkruani në adresën fiskalizimi.helpdesk@tatime.gov.al.